Qué é la SLA?
Se trata d'una sociedat cientifica, fundada el 20 de março de 2004 a Graus, (Uesca). Está integrada per una vintena de personas, naturals en la suya mayoria, de las zonas aragonesofonas. Son filologos i filologas, escritors i escritoras, que comparten una comun vision i interés per l'estúdio cientifico, i la dignificacion, de los dialectos que constituyen l'aragonés, i pel benasqués, cosa que pasa per asegurar la suya transmision.
Vista general de Graus
La Sociedat de Lingüistica Aragonesa, considera que los dialectos constitutivos de l'aragonés, i la llengua parllada a la vall de Benás, han d'estar los verdaderos protagonistas en las línias de política lingüística de l'aragonés i el benasqués. I reclama una Lei que'n regule l'uso i educacion.
Son finalidaz principals de la SLA contribuir a un millor conoiximiento de l'espácio aragonés, en estreita interaccion historica con los ámbitos catalan i gascon.
Qué ideário tiene la SLA?
La Sociedat de Lingüistica Aragonesa (SLA) tiene en la obra de Joan Coromines i Vigneaux una referéncia fundamental de cómo aspira a posar en practica l'estúdio de l'aragonés i el benasqués.
Joan Coromines i Vigneaux
(Barcelona, 1905- Pineda de Mar, 1997)
La SLA manifiesta tamé un espritu de filiacion con la fayena pionera que, en 1896, va encomençar el filologo francés Jean-Joseph Saroïhandy, i con el treballo de dialectologia feito per l'avogau Benito Coll Altabás, qui va ser colaborador fundamental de l’Estudio de Filología de Aragón, el qual, dirigiu per Juan Moneva y Puyol -autor d'un diccionário aragonés-, va estar activo entre 1915 i 1923.
Jean-Joseph Saroïhandy
(Saint-Maurice-sur-Moselle, 1867-París, 1932)
Benito Coll Altabás (Binéfar, 1858-1930)
Qué finalidaz tiene la SLA?
La Sociedat de Lingüistica Aragonesa postula l’estúdio lingüistico de los dialectos constitutivos del romance aragonés que se parlla a l’Alto Aragon, i del benasqués.
Dito estúdio s’entiende de forma interdisciplinar, an hi dentren totas ixas investigacions sobre l’aragonés, en las suyas diversas manifestacions culturals –literaria, antropologica, sociologica, historica...–, en colaboracion con las asociacions, escritors u estudiosos de las zonas an se parllan, u s’han parllau, no fa guaire dialectos de l’aragonés.
Son prioridaz de la Sociedat:
Treballar per l'estúdio d'estas variedaz, la suya fonetica, morfologia, sintaxis, lexico i semantica, i tamé contribuir-ne a la codificacion. Un primer paso é la propuesta d'ortografia aragonesa feita per la suya revista, De Lingva Aragonensi, en juliol de 2006. En este sentiu la SLA está ubierta a qualquier propuesta cientifica de normativizacion i normalizacion.
La SLA vei fundamental la transmision de la llengua. En consequéncia, posa un interés especial i prioritário en la elaboracion i en l'asesoramiento de materials escolars, vocabulários, diccionários u atros materials d’ensenyança, tot con miras a la docéncia de cada dialecto aragonés en las respectivas zonas d'uso.
La SLA considera de suma importáncia la recopilacion i estúdio de la onomastica i el lexico de l’aragonés i el benasqués.
Qué actividaz fa la SLA?
La edicion de la revista científica De lingva aragonensi. S'edita un volumen anyal. El primero se va editar en 2005, en los emprincípios de 2009 se publicará el tercer volumen, que corresponderá a 2007.
Dará prioridat a la publicacion própia u en colaboracion de diversos estúdios científicos, modernos u clasicos, ya seigan de carácter sincrónico como diacrónico, sobre los dialectos constitutivos aragoneses.
La realizacion de jornadas científicas d'estúdio i promocion de l'aragonés en qualquiera de los suyos dialectos i la colaboracion en las jornadas que considere menester. En este sentiu cal mencionar la participacion, dende la creacion de la SLA, a las Jornadas de Llenguas de la Ribagorça, que cada primavera se fan a Graus (Uesca), la coorganizacion con Romania Minor, en abril de 2004, de las Segundas Jornadas Ibérico-Italianas de Lenguas Románicas Minoritarias: La estandarización de las lenguas minoritarias románicas (Graus) i la organizacion de las jornadas de Celebracion del Dia Europeu de las Llenguas en setiembre de 2008.
Celebracion del Dia Europeu de las Llenguas, Graus, setiembre de 2008
(de cara ta la dreita: Xavier Tomás, José Antonio Saura i Jordi Suïls)
La SLA está ubierta a la colaboracion con las universidaz i asociacions que tiengan bel interés en la qüestion lingüistica altoaragonesa, en especial con las d'aquellas poblacions pirinencas, occitanas, catalanas i vasco-navarras, vecinas a l'ária d'uso de l'aragonés i el benasqués.
Campo, a l'Alta Ribagorça
|
|
|
|
